Ün sguard inavant

miaEngiadina prosperischa in möd fich allegraivel. Ma a blers interessa co chi guarda oura l’avegnir da nossa cumünanza. Gugent lessa infuormar in nos newsletter – chi ha uossa nom “tiasNovitats” – regularmaing sur da nos progets futurs in lingua rumantscha.

Il prüm tema ch’eu less tour sü es miaEngiadina e la lingua rumantscha. Da diversas varts eschna gnüds trats attend, cha no publichain massa pac in rumantsch. Quai es ün punct fich valid e no lain eir müdar quist fat e scriver in avegnir daplü contribuziuns rumantschas. Per quai dovraina pero vos sustegn! I’l team da miaEngiadina nu vaina avuonda glieud chi ha cugnuschentschas da nossa lingua suffiziaintas per scriver contribuziuns. No vessan pero fich grond plaschair, scha no chattessan voluntaris in nossa cumünanza chi güdan a scriver o tradüer texts. Fat il bain e s’annunzchai pro no, scha vessat plaschair da contribuir quia alch a favur da noss’initiativa! Implü lessa trar attend, cha no vain diversas plazzas da lavur avertas. No tscherchain giuvnas o giuvens rumantschs chi lessan lavurar per miaEngiadina in plazza plaina o parziala. Concret tscherchaina glieud chi güda a gestiunar ils Mountain Hubs a Scuol e La Punt, chi sustegna a no pro lavurs administrativas o chi sustegna nos team d’internet! Cun plaschair e buonder spettaina sün vossas annunzchas!

Daplü infuormaziuns: info@miaengiadina.ch